புளுவேலைப் போல குழந்தைகளை தற்கொலைக்கு தூண்டும் ‘மோமோ’- பெற்றோர்களே ஜாக்கிரதை!!

வாட்ஸ்அப்பில் ‘மோமோ’ என்ற தற்கொலை கேம் பரவுவதால், பெற்றோர்கள் ஜாக்கிரதையாக இருக்க வேண்டும் என இங்கிலாந்து காவல்துறை தெரிவித்துள்ளது. 

கடந்த சில மாதங்களுக்கு முன், ப்ளுவேல் என்ற தற்கொலை கேம் இணையத்தில் வெளியாகி, மிகப்பெரிய பரபரப்பை ஏற்படுத்தியது. இந்த கேமை விளையாடும் சிறுவர்கள், இளைஞர்கள் தற்கொலை செய்து கொள்ள தூண்டப்பட்டதே அதற்கு காரணம். இதையடுத்து, இந்த கேமின் ஆபத்தை உணர்ந்த சர்வதேச நாடுகள், அதை தடை செய்தன. இந்நிலையில், தற்போது ‘மோமோ’ என்ற தற்கொலை கேம் வாட்ஸ்அப்பில் பரவி வருவதாக தகவல் வெளியாகி உள்ளது. 

பேஸ்புக்கில் அறிமுகம் இல்லாத நபர்களுக்கு போன் செய்ய வேண்டும் என தொடங்கிய இந்த சேலஞ்ச், சமூக வலைத்தளங்களில் கிகிசேலஞ்ச், பிட்னஸ் சேலஞ்ச் வைரலாவதைப் போல, வாட்ஸ்அப்பில் பரவத் தொடங்கியது. 

இந்த சேலஞ்சில் பங்கேற்க, வாட்ஸ்அப்பில் பகிரப்படும் மோமோ என்ற எண்ணை சேமித்து, அதற்கு மெசேஜ் செய்ய வேண்டும். அந்த மோமோ தொடர்பு எண் பார்க்க மிகவும் பயங்கரமான தோற்றத்துடன் பேய் போல இருக்கும். முதலில், அந்த எண்ணிலிருந்து வன்முறை நிறைந்த படங்கள் அனுப்பப்படுகின்றன. அதைத் தொடர்ந்து, ப்ளுவேல் சேலஞ்சைப் போல, முதலில் சிறிய சிறிய சேலஞ்ச்களை செய்ய வைத்து, பின்னர் பயனரின் தகவல்களைத் திருடி, தற்கொலைக்குத் தூண்டுகிறது. 

இந்த கேமை விளையாடிய, அர்ஜென்டினா நாட்டைச் சேர்ந்த 12 வயது சிறுமி தற்கொலை செய்து கொண்டுள்ளதாக செய்தி வெளியாகியதை தொடர்ந்து, இந்த கேம் தொடர்பான விழிப்புணர்வு பெற்றோர்கள் மத்தியில் பரவத் தொடங்கியது. 

தற்போது வரையில், இந்த கேமானது அர்ஜென்டினா, மெக்ஸிகோ, அமெரிக்கா, பிரான்ஸ், ஜெர்மனி உள்ளிட்ட நாடுகளில் பரவியுள்ளதாக தெரிவிக்கப்பட்டுள்ளது. இதனால், மற்ற நாடுகளும் குழந்தைகளை இது போன்ற சேலஞ்ச்களில் பங்கேற்காமல் பார்த்துக்கொள்ளும்படி குழந்தைகளுக்கு எச்சரிக்கை விடுத்துள்ளது. 

Google+LinkedinYoutube